Toh bhaiyya aisa hai, traveling shuru kiye humein ho gaye hai 2 saal. Pahele toh traveling jaisa koi term hi nahi judta tha zindagi ke sath, humare yaha toh bas 'Trips' hote the woh bhi Family wale. Jo dost ghumne jaya karte the woh aksar humein kabhi apne sath ane ke liye poocha nahi karte, hum mein tab shayad woh baat nahi rahi hogi, aur waise bhi college ka samay assingment copy karne aur 05.26 ki virar local ke chakkar kaatne mein hi gujar gaye, din ke 4 ghante local train mein, yehi thi humari traveling.
Jab 2016 mein job lagi tab socha abhi ghum sakte hai thoda bahot. But pre planned cheezein kahan execute hoti hai kamine doston ke sath, hamesha koi na koi bahana laga rehta hai unka, aaj nahi agle hafte, aaj toh bhai ki party hai falana - falana, bas idhar udhar ki bhaukali karte rehte hai. Fir socha chodo yaar, ‘akele hi nikal lete hai’.
Bas ye akhir wali line ne zindagi badal di. Aaj kal toh bas weekend ane ka intezaar rehta hai, Friday shyam hui nahi ki koi bhi train pakad ke nikal liye, na kisi ko poochna padta hai ki bhaiya kaunsi hotel book karu, na toh kisiko convince karna padta hai ki Sleeper coach jaisa koi dibba nahi hota, bas apna chota bag aur kuch naya dekhne ki umeed leke nikal lete hai.
Solo traveling ka toh apna hi swag hota hai. Photos dekhkar toh pata chal hi raha hoga, upar se na kisi pe dependency aur 'peace of mind' alag se.
Hum toh Vietnam tak ki dhool chat aaye woh bhi akele. Pahele toh bada dar tha ki anjaan desh mein akele kaise ho paayega, lekin hum bas ticket karke nikal liye, jyada sochna bhi kabhi kabhi sahi nahi hota hai. Aur fir kya, wahan toh jaise azadi mana rahe the hum apni, kahin bhi jao, kisike bhi sath khana khao, sabko apna dost bano, bada maza aa raha tha.
Ye trip ke baad to aise laga ke solo hi jaane mein jyada khushi hai. Shuru majboori mein kiye the, ab maza aa raha hai.
Vietnam ke baad hum Spiti gaye, bahot logon ne mana kiya ki aisi jagah akele nahi jaate woh bhi bike leke, but humne socha zindagi toh adventure kar hi rahi hai humare sath, toh hum bhi jara zindagi ke maze le lete hai. 6 din akele unn pahadon mein jaise jannat hi naseeb ho gayi, bike bas chalti jaa rahi thi aur bas chalti hi jaa rahi thi, na koi network, na koi gaadiyan, no koi restaurant, na koi petrol pump, mano jaise 'The Walking Dead' ka koi episode chal raha ho, ke abhi Zombie nikal ke aa jaayenge.
Spiti aane ke baad ek baat toh humein samaj gayi ke, zindagi hamesha unka sath degi jo kuch kar dikhane ki chah rakhenge, baki toh sab moh maya hai. 20 saal baad aapne aaj kaunse brand ka tshrt kharida ya fir kaunse rang ke joothe pehne, ye mayine nahi rakhega, lekin agar aaj himmat juta liye aur kahin akele nikal pade toh zindagi jaroor badal jaayegi, ye humara dawa hai.
Toh bhaiyya, uthaiye apna zhola aur chal padiye zindagi ke maze lene, akhir isi ko jeena kehte hai.
' fill='%23359391'%3e %3cpath d='M46.1538462%2c43.5714286 L41.5%2c50 L36.8461538%2c43.5714286 L36.8670256%2c43.5714286 C36.3173077%2c42.7142857 36%2c41.6851429 36%2c40.5714286 C36%2c37.4854286 38.4535641%2c35 41.5%2c35 C44.5464359%2c35 47%2c37.4854286 47%2c40.5714286 C47%2c41.6851429 46.6826923%2c42.7142857 46.1329744%2c43.5714286 L46.1538462%2c43.5714286 Z M41.4294872%2c39 C40.6150641%2c39 39.9487179%2c39.675 39.9487179%2c40.5 C39.9487179%2c41.325 40.6150641%2c42 41.4294872%2c42 C42.2439103%2c42 42.9102564%2c41.325 42.9102564%2c40.5 C42.9102564%2c39.675 42.2439103%2c39 41.4294872%2c39 L41.4294872%2c39 Z' id='Location-white'%3e%3c/path%3e %3c/g%3e %3c/svg%3e)
