વેકેશનમાં સસ્તામાં દીવ કેવી રીતે જશો, આ રીતે હરોફરો અને કરો મોજ

દીવનું નામ પડે એટલે ગુજરાતીઓ અને ખાસ કરીને અમદાવાદીઓના ચહેરા પર ચમક આવી જાય. વીકેન્ડ હોય કે વેકેશન, અમદાવાદીઓ દીવ જવા માટે ઉતાવળા બનતા હોય છે. દીવ એટલે મીની ગોવા. હવે ગોવા દૂર છે અને વારંવાર ગોવાનો ખર્ચ પણ ન પોષાય એટલે દીવ જઇને દરિયામાં ન્હાવાની, રેતીમાં આળોટવાની ઇચ્છા પૂરી કરી શકાય. કેટલાક પીવાના શોખીનો પણ બિયરનો ટેસ્ટ કરવા દીવ ઉપડી જતા હોય છે. હવે તમારે ફેમિલી સાથે સસ્તામાં દીવ જવું હોય તો અમે કેટલાક રસ્તા બતાવીએ જેનાથી તમે ઓછા ખર્ચે દીવ ફરવાનો આનંદ માણી શકો છો.

કેવી રીતે જશો

અમદાવાદથી દીવનું અંતર 366 કિલોમીટર છે. અમરેલી અને કોડિનાર થઇને દીવ જઇ શકાય છે. રાજકોટથી દીવ 233 અને જુનાગઢથી દીવ 151 કિલોમીટર દૂર છે. અમદાવાદથી દિવ પહોંચતા લગભગ 8 થી 9 કલાક થાય છે. નજીકનું રેલવે સ્ટેશન વેરાવળ છે જે 90 કિલોમીટર દૂર છે. દીવમાં એરપોર્ટ છે. અમદાવાદથી ફ્લાઇટ મળી રહેશે.

વિકલ્પ-1

પોતાનું વાહન લઇને કે ફ્લાઇટમાં દીવ જવું મોંઘુ પડી શકે. હાં, પરિવારમાં 4 કે 5 સભ્યો હોય તો તમે પોતાની ડીઝલ કે સીએનજી કારમાં દીવ જશો તો સસ્તું પડશે.

વિકલ્પ-2 હવે બીજો વિકલ્પ છે બસ. સરકારી બસમાં 200 થી લઇને 650 રૂપિયા સુધીની ટિકિટ છે.

ત્રીજો વિકલ્પ છે ટ્રેનમાં જવાનો. ટ્રેનમાં સ્લીપર ક્લાસનું ભાડું 300 રૂપિયાની આસપાસ છે. એસી કોચમાં 700 રૂપિયા સુધી ખર્ચ થશે. જો કે ટ્રેન તમને વેરાવળ સુધી જ લઇ જશે. ત્યાંથી તમારે ટેક્સી, શટલ રીક્ષા કે બસમાં દીવ જવું પડશે જે લગભગ 100 કિલોમીટર દૂર છે.

ક્યાં રહેશો

દીવમાં ઘણી હોટલો છે. નાગોઆ બીચ નજીકની હોટલ કે રિસોર્ટ પ્રમાણમાં મોંઘા છે. ફોર્ટ વિસ્તારમાં સસ્તી હોટલો છે. જો કે તમે હોમસ્ટેમાં પણ રોકાઇ શકો છો. હોમસ્ટેમાં પ્રમાણમાં પૈસા પણ ઓછા ખર્ચ થશે અને તમને સુવિધાઓ પણ પૂરતી મળી રહેશે.

ટુ-વ્હીલર રેન્ટ પર લઈ લો

જો તમે દીવ શહેર એક્સપ્લોર કરવા માંગો છો તો ગોવાની જેમ દીવમાં પણ તમે બાઈક-એકટીવા રૂ.૩૦૦-૪૦૦ના વ્યાજબી દરે ભાડેથી લઈને ફરી શકો છો. રિક્ષામાં ફરવુ મોંઘુ પડી શકે છે. તમે જે હોટેલમાં રોકાયા હોવ ત્યાંથી અથવા તો નજીકના કોઈ પણ રેન્ટિંગ પોઈન્ટ પરથી તમે સ્કૂટી લઈ શકો છો.

દીવનો ઇતિહાસ

ઇસ.1953 સુધી ગોવા, દમણ અને દીવની પ્રજા સ્વાતંત્ર્ય સંગ્રામના મુખ્ય પ્રવાહથી અલગ રહી અને તેનું કારણ જોઇએ તો ઇ.સ.1539માં પોર્ટુગીઝ ગર્વનર નોરોંયાં સાથે થયેલી સંધિ પ્રમાણે દીવમાં પોર્ટુગીઝ શાસન હતું. પરંતુ આ પ્રદેશની ભાષા ગુજરાતી, સંસ્કૃતિ હિંદુ અને અન્ય વસતી પણ ભારતીય સંસ્કૃતિના પરિવેશમાં જ હતી જેથી ઇ.સ.1953માં સ્વાતંત્ર્યની લહેર ઉઠવા માંડી અને ઇ.સ.1961માં ડિસેમ્બરની 19 તારીખે દીવ પોર્ટુગીઝ શાસનથી મુક્ત થયું. દિવ એક કેન્દ્રશાસિત પ્રદેશ છે.

જોવાલાયક સ્થળો

દીવ ફોર્ટ

પોર્ટુગીઝોએ ભારતમાં સુરત, દીવ, દમણ, કેરાલા સહીત અનેક શહેરમાં કિલ્લાઓ બાંધ્યા છે, પરંતુ દીવનો કિલ્લો વિશાળ અને ક્ષતિરહિત છે. ૧૬ મી સદીમાં પોર્ટુગીઝોએ બનાવેલા આ કિલ્લાનો તેઓ યુદ્ધની કુનેહો માટે ઉપયોગ કરતા. ભવ્ય કિલ્લામાં મુકેલી તોપો જાણે હજુએ એ સમયની શક્તિ અને સાહસના પડઘા પાડે છે. દીવ ફોર્ટ પરથી અરબી સમુદ્રનો નજારો ૧૮૦ ડીગ્રીના એન્ગલથી જોવા મળે છે.

ફોર્ટ પરથી સામે દેખાતી સમુદ્રની વચ્ચે આવેલ સબ-જેલ હકીકતમાં પાનીકોટા કિલ્લો છે. સ્થાનિક લોકો તેને ફોર્ટીમ ડો માર તરીકે ઓળખાવે છે. સિમ્બરની ખાડીમાં નાના ટાપુ પર આવેલ આ કિલ્લાનો હવે જેલ તરીકે ઉપયોગ થાય છે, જો કે હાલમાં આ જેલમાં કોઈ કેદી નથી. કિલ્લાની સામે લાઈટ હાઉસ આવેલું છે, જે રાતના સમયે રોશનીથી ઝગમગે ત્યારે કિલ્લા, સમુદ્ર અને લાઈટ હાઉસનો અદ્ભુત નજારો જોવા મળે છે.

સેન્ટ પોલ ચર્ચ

દીવનું બીજું આકર્ષણ છે સેન્ટ પોલ ચર્ચ. ગોઆમાં આવેલ બાસ્લિકા ઓફ બોમ જિસસ ચર્ચ જેવું જ આર્કીટેક્ચર હોવા છતાં તેનું સફેદ રંગનું બાંધકામ સહેલાણીઓને વિશેષ આકર્ષે છે. આ ચર્ચના નિર્માણમાં દસ વર્ષ લાગ્યા હતા. તેની બાજુમાં જ સેન્ટ થોમસ ચર્ચ આવેલું છે, સુંદર બાગ અને ફાઉન્ટેનના રસ્તે પગથીયાઓ બનાવી ચર્ચનો પ્રવેશદ્વાર બનાવ્યો છે. ગોથિક શૈલીમાં બનાવવામાં આવેલ આ ચર્ચને હવે મ્યુઝીયમમાં રૂપાંતર કરી નાખવામાં આવ્યું છે. જેમાં પ્રાચીન શાસકો અને ખ્રિસ્તી સંતોની કોતરણી કરેલ મધ્યમ કદની મૂર્તિઓ, લાકડાના કોતરણી કામના નમુના અને પત્થરના શિલાલેખો મુકવામાં આવ્યું છે.

ગોમતીમાતા બીચ

મોટાભાગના ટૂરિસ્ટ દીવના નાગોઆ બીચની મુલાકાત લેતા હોય છે પરંતુ ગોમતીમાતા બીચની પણ ખાસ મુલાકાત લેવી જોઈએ. અહીં તમને અદ્દભુત સૂર્યાસ્તનો નજારો જોવા મળશે. દીવના વાંકબારા ગામ પાસે આવેલા આ બીચ પર તમને ઘણાં દરિયાઈ જીવો જોવા મળશે. અહીં તમને કલરફુલ કરચલાના પણ દર્શન થશે. આ દરિયામાં નાહવાનું ટાળો તો સારું છે.

નાઈડા કેવ્સ

દીવ આવતા ઘણાં ઓછા લોકો નાઈડા કેવ્સની મુલાકાત લેતા હોય છે, પરંતુ દીવ ફોર્ટ નજીક આવેલા આ સ્થળની વહેલી સવારે મુલાકાત લેવી જોઈએ. જો ફોટોગ્રાફીનો શોખ હોય તો વહેલી સવારે સૂર્યોદયના સમયે અહીં પહોંચી જજો. ગુફાની દીવાલો વચ્ચે ખાલી રહેતી નાનકડી જગ્યામાંથી આવતા સૂર્યના કિરણોથી ગુફામાં પ્રકાશનો અદ્ભુત નજારો બને છે. કુદરતની અદ્ભુત અજાયબી સમાન નાઈડા ગુફા જોવા માટે સવાર અથવા બપોરનો સમય શ્રેષ્ઠ છે.

સી શેલ મ્યુઝિયમ

આ મ્યુઝિયમ નેવી કેપ્ટન દેવજીભાઈ વિરા ફુબલારીઆએ બનાવડાવ્યુ હતું, તેમણે અનેક પ્રકારના આવા શેલ ભેગા કર્યા હતા અને અહીં મુક્યા છે. અહીં લગભગ 3000 પ્રકારના શેલ જોવા મળશે.

આઈ.એન.એસ. કુફરી

આઈ.એન.એસ. કુફરી એ વર્ષ ૧૯૭૧ માં ભારત-પાકીસ્તાનના યુદ્ધમાં શહીદ થયેલા સૈનિકોને શ્રદ્ધાંજલિ આપતું નાનું મેમોરીયલ છે. તો ચક્રતીર્થ મહાદેવ મંદિરની બાજુમાં આવેલ સરુના વૃક્ષોથી અદ્ભુત ચક્રતીર્થ બીચ ખુબ સુંદર અને શાંત છે અહીં ન્હાવાની મજા આવે છે.

ગંગેશ્વર મહાદેવ મંદિર

કહેવાય છે કે પાંડવોએ પોતાના અજ્ઞાત વાસમાં અહીં આવીને મહાદેવની આરાધના કરી હતી. અહીં સમુદ્રદેવ શીવલિંગ પર જળાભિષેક કરતાં હોય એ રીતે સમુદ્રના મોજાઓ શિવલિંગ પર અફળાય છે. જે આ મંદિરને વિશેષ બનાવે છે.

નાગવા બીચ

દીવના દરેક દરિયા કિનારાઓમાં નાગવા બીચ અલગ તરી આવે છે. નાગવા બીચ પર અનેક સહેલાણીઓ વોટર એડવેન્ચર અને અન્ય એક્ટિવિટીઝ માટે આવે છે. સમુદ્રની સામે જ બાર, રેસ્ટોરન્ટ અને હોટેલો આવેલી છે જ્યાં પ્રવાસીઓ ન્હાઈને સી ફૂડ, નોન વેજ કે વેજ ફૂડ માણી શકે છે.

દેશ-વિદેશના પ્રવાસ પ્રસંગો અને તમારી મુસાફરીના અનોખા અનુભવો શેર કરો, આ સિવાય અન્ય મુસાફરો ક્યાં જઇ રહ્યા છે અને તેઓ શું કરી રહ્યા છે? તે પણ જાણો. એકબીજાની સાથે ફરીએ અને એક બીજાને ગમતા રહીએ

તમારા જેવા લાખો ફરવાના શોખીન લોકોની જેમ તમે પણ Tripoto પર તમારા પ્રવાસની તસવીરો અને અનુભવો શેર કરો

મફતમાં ટ્રાવેલ કરવા માંગો છો? Tripoto પર આવી ક્રેડિટ મેળવો અને પછી તમારા આગામી પ્રવાસમાં હોટેલ બુકિંગ તેમજ વેકેશન પેકેજ મેળવો

Tripoto ગુજરાતીને ફેસબુક પર ફોલો કરવા માટે અહીં ક્લિક કરો

ટ્રાવેલ અપડેટ માટે Tripoto ગુજરાતીની ટેલિગ્રામ ચેનલ સાથે જોડાવા માટે અહીં ક્લિક કરો