Bahut dino se pushkar ghumne ka man tha. Aaj antatah meri ichcha poori hone jaa rahi thi. Maine ek saathi ke saath ajmer aur pushkar ghumne ka karyakram banaya tha. Subah delhi se Ajmer ke liye shatabdi pakdi. Train karamchariyo ne rajasthani topi pahni thi jiske karan abhi se hi khud ko rajsthan main mahsoos kar rahe the. Delhi, Haryana hote huye train jaise jaise rajasthan main ghusne lagi rajsthani sanskriti bhi dikhai dene lagi. Alag veshbhusha alag andaaz saaf bata rahe the ki rajasthan aa gaya hai. Safar 6 ghante ka tha isliye kuch kitabe rakh li thi jnhe padhte huye samay kab nikal gaya pata hi nahin chala. Train ajmer station pahunchi. Akhirkar mera ajmer pushkar ghumne ka sapna sach ho raha tha. Main bahut khush tha. Man main rajasthani lok geet (kesariya balam padharo mhare des) chal raha tha. Aravali pahadi shrankhla se ghira Rajasthan ka paanchva sabse bada shahar Ajmer khwaja moinuddin chishti ki dargah ke liye jaana jaata hai.
Station par hotel ki gadi lene aa gai thi. Hotel pahuch kar khana khaya, aur fr kuch der araam kiya. Shaam ko khwaja moinuddin chishti ki dargah-Ajmer sharif ke liye nikle. Khwaja garib nawaz ko Muhammad ka hi vanshaj mana jaata hai. Maante hai ki khwaja garib nawaz ke dar se koi khali haath nahin jaata aur isiliye hazaron log roz yahan ziyarat karne aate hain. Humne bhi khwaja ji ki mazar par chadar chadhai aur fr bahar aakar baith gaye. Itni bheed main bhi ek ajeeb sa sukoon ek ajeeb si shanti mahsoos kar rahe the. Tabhi namaz ka samay ho gaya jiske paschat qawwali shuru ho gai. Allah hu, bhar do jholi jaisi qawwaliyan sunkar anand aa gaya aur khwaja ji se aman aur shanti ki dua maangte huye hum bahar aa gaye. Vahan se ajmer ka bazaar ghumne nikle aur mango masala hotel main swadisht khana kha kar hotel vapis laut aaye.
Agle din subah nashta karke ajmer shahr dekhne nikal gaye. sabse pahle sai mandir gaye. Subah subah sai baba ke darshan kiye aur aage ghumne chal diye. Prthiviraj chauhan smarak dekha. Ye smarak us vir yodha ki Muhammad ghori ke oopar viajay ka prateek hai. Smarak ke peeche pahadi par taragrh kila dikhai deta hai jo smarak ki shobha aur badha deta hai. Vahan ki mati chum kar us veer yoddha ko salaam karte huye adhai din ka jhonpra dekhne nikal gaye. Qutub-ud-din-aibak dwara banai gai ye masjid kahte hain dhai din main tyyar ho gai thi aur ek mandir ki jagah bani thi isilye mandir ki bhi jhalak dikhai deti hai.
Vahan se akbar ka qila dekhne nikle. Mughal samrajya ki top, banduke, bhale,talwar aur bahut si cheezen sangrahalya main rakhin hain aur mughal samrajya ke bare main jankari de rahin hain. Fr soniji ki nasiyan dekhne gaye. Ye ek jain mandir hai jo apni swarn nagri ke liye mashhoor hai. Mandir ke peeche ek bade hall main swarn nagri bani hai jo bahut sailniyon ko akarshit karti hai. Sonyji ki nasiya ke baad annasagar jheel dekhi. Maharaja Annaji dwara banai gai ye adbuth jheel lagbhag 13km main faili hai. Is khubasurat jheel ke paas thodi der tahal kar hum pushkar ke liye nikal gaye..
Pushkar ajmer se 14-15 km ki doori par hi hai. Arvalli pahadiyon se hote huye dopahar tak pushkar pahuche. Resort pahuch kar khana khaya, thodi der araam kiya aur fr shaam ko brahma ji ke mandir ke liye nikle. Pushkar isi mandir ke liye jana jaata hai. Ye mandir jagat pita brahmaji ke kuch hi mandiro main se ek hai aur isi mandir ki vajah se pushkar ko paanch dharmik sthano main se ek maana jaata hai. 2000 saal purane is mandir ki vastu kala dekhne yogya hai. Om brahmadevay namah, brahmaji ke darshn kiye, mandir main chandi ka kachua bana hai uske darshan kiye aur fr bahar aa gaye. Mandir ke paas hi dharmik pushkar jheel hai. Maana jaata hai brahma ji ke kamal ki kuch pankhudiya girne se ye jheel bani thi. Aur isiliye shahar ka naam pushkar(pushp) pada tha. Jheel ke paas thodi der baithe aur fr pushkar ka bazaar dekhne nikal gaye. Rajsthani vastuyon aur videshi sailaniyo se bhara pushkar ka bazaar dekhne yogya tha. Humne ek scooty le li thi. Ab raat ho gai thi, Hazaron café se bhara Pushkar shakahariyon ka jannat kaha jaata hai. Humne funkymonkey café pe khaya aur resort laut aaye. Agle din suryauday dekhne savitri mandir jaana tha isliye jaldi so gaye.
Agle din subah jaldi uth kar tyyar huye aur 5 baje savitri mandir ke liye nikal gaye. Brahmaji ki pahli patni savitri ji ka yah mandir ratnagiri pahadi par bana hai. Kahte hain brahmaji se naraz hokar savitriji yahan aa kar baith gait hi. Lagbhag 5:30 baje chadhai shuru ki aur aadhe ghante main oopar pahuch gaye. Subah subah pahadi par chadhna bhi alag hi anubhav tha. Jab oopar pahuche to aarti shuru hui thi. Pahle aarti ki aur fr bahar surya uday dekhne ke liye ek chabootra bana tha vahan aakar baith gaye. Chai peete peete aravali ki pahadiyon main se nikalta hua suryauday dekha. Adbhut,apoorv,alaukik har shabd us khoobsurat drishya ke liye kam tha. Suryauday dekh kar vapas niche aa gaye. Aakar nashta kiya ek baar fr brahma mandir darshan karne chale gaye. Thodi der mandir main hi baithe aur fr scooty se lambi sair pr nikal gaye. Lautte huye ek dhabe par rajasthan ka prasidhdh dal bati churma khaya. Swadisht dal baati kha kar resort laut aaye. Shaam ko nikle aur bazaar hote huye ek ghaat par suryaast dekhne baith gaye. Aravali main Chupta hua suraj aur jheel main padti uski parchai dekhne yogya thi. Kuch log sitar jaisa koi vadya yantra pr rajasthani lok geet baja rahe the. Poori shaam vahin baitha raha aur us khoobsurat drishya ko dekhta raha. Raat ko khana khaya fr puskar ke mashhoor malpuye khaye aur resort aa gaye.
Agle din vapis delhi ke liye nikalna tha. Subah uth kar resort main hi araam kiya. Alag alag chidiyon ki awaaz bahut meethi lag rahin thi. Resort se nikal kar sabse pahle scooty vapis ki. Pushkar se ajmer aaye aur delhi ke liye fr shatabdi pakdi. Raat tak main rajsthan ki khoobsurti sanskriti aur paripati ko man main basaye delhi aa gaya tha.
Jab pushkar gaya tha tab pushkar mele ke bare main bahut suna tha parantu dekh nahin paaya tha. Pushkar jaisi jagah main baar baar ja sakta hun aur agar mauka prasiddh mele ko dekhne ka mile to baat hi kuch aur hai. Jo suna aur jaana hai use jeena chahta hun.
' fill='%23359391'%3e %3cpath d='M46.1538462%2c43.5714286 L41.5%2c50 L36.8461538%2c43.5714286 L36.8670256%2c43.5714286 C36.3173077%2c42.7142857 36%2c41.6851429 36%2c40.5714286 C36%2c37.4854286 38.4535641%2c35 41.5%2c35 C44.5464359%2c35 47%2c37.4854286 47%2c40.5714286 C47%2c41.6851429 46.6826923%2c42.7142857 46.1329744%2c43.5714286 L46.1538462%2c43.5714286 Z M41.4294872%2c39 C40.6150641%2c39 39.9487179%2c39.675 39.9487179%2c40.5 C39.9487179%2c41.325 40.6150641%2c42 41.4294872%2c42 C42.2439103%2c42 42.9102564%2c41.325 42.9102564%2c40.5 C42.9102564%2c39.675 42.2439103%2c39 41.4294872%2c39 L41.4294872%2c39 Z' id='Location-white'%3e%3c/path%3e %3c/g%3e %3c/svg%3e)
